عمار أبوالركب يكتب عن عبير عصام .. أمي سيدة الأشياء الجميلة
ناس كتير من صحابى شايفني جدع معاهم و قلبى طيب علشان حته الرفق بالحيوان لكن اللى متعرفهوش ممكن لما أقف مع أى حد صاحبى بكون معاه طبعاً علشان الأصول، و عيب حد يحتاجنى و مكنش معاه بس مرات قليلة من جوايا بكون مش عايز أساعد و بيكون بسبب مثلاً إني مرهق أو تعبان أو مش عارف أساعده أو فى أوليات لازم أظبطها و هو جالى محتاجنى فى حاجة طارئه ف الأوليات اتلخبطت بس مهما كان لازم أكون معاه علشان دى الأصول.
أمى بقى الحاجة عبير جدعه و معندهاش ذرّه من جواها من الكلام اللى عندى اللى قولته ، سباقه بالخير دايماً ، اى حد محتاج و تعرف ، تسارع و تقوم تساعده من غير ما تفكر ثانية زيي كدة الموضوع أصلاً نابع من جواها حتى ممكن تشيل نفسها جمايل و تسدها بتعبها و فلوسها علشان تتوسط لحد فى خدمه معينه من غير ما تعرفه كمان مهما الخدمة كانت كبيره اللى هتعملها لحد تهونها عليه و تقوله سهله متقلقش و هعملهالك مع إنها حاجات بتكون كبيره و دى درجة من الإحسان صعب حد يوصلها ما شاء الله، ف لو حد شايفنى جدع ف أنا متعلم منها و بقوله برضه شايفنى جدع جدًا كدة بس علشان مشفتش أمى.
حتى حته الرفق بالحيوان اللى عندى اللى مشهور بيها هى ليها نصيب كبير جدا فيها فى تكوين شخصيتى إنها تكون كدة لان زى ما قولت هى دايما سباقة فى الخير ف لما كانت تشوفنى ملهوف و عايز أساعد اى حيوان دايماً تشجعنى و لو الحيوان ده محتاج فلوس لعلاج أو أكل تقف معايا و تساعدنى فى علاجه ده له دور كبير فى أن حته الرفق بالحيوان تزيد و تتشجع عندى ، لأن لو دايما كانت مثلا تقطمنى على فلوس بصرفها عليهم و تقولى ما تصرفها فى حاجة تانية أولى أو تتريق عليا علشان مشاعرى دى ناحيتهم كان ممكن أتأثر و مبقاش عندى حته الرفق بالحيوان دى أو مثلا كل ما أساعدهم هحس إنى متكدر علشان هتقطمنى، بس لا العكس كل ما يبقى فى حالة قدامى بحس انى متشجع علشان عارف ان أمى فى ضهرى فى النقطه دى.
تالت حاجة الناس تعرف عندى عزيمة و اصرار قوية جداً بسبب كل ما وزني يزيد جداً أقدر اخس جامد و عملت الموضوع ده ٨ مرات و مش بمل دى كمان متعلمها من أمى بشكل غير مباشر، أمى من سيده بسيطه فى أسوان معاها بس الثانوية توصل لل هي فيه دلوقتى من أكبر الشركات العقارية فى مصر و تكمل تعليمها بشهادات متتعدش ما شاء الله يبقى أكيد لازم اتعلم منها الإصرار و العزيمة.
حبيت أقول الكلام ده فى عيد ميلادها هى مش عارفه كل الكلام اللى قولته ده بس ده وقته ربنا يخليكي لينا يا حجه و يديمك نعمه فى حياتنا و كل سنه وانتى طيبه و عقبال سنين كتير ان شاء الله .
